අළුත් තැනක්

මහා ලොකුවට අවුරුද්දයි කියලා අණබෙර ගහලා කිව්වට එදාට පස්සේ කිසිම දෙයක් ලියන්න උනේ නෑ. හැබැයි ඉතින් පහුගිය ටිකේ වෙච්ච දේවල් හැටියට මේක පැත්තට එන එක අතහැරලා දාන්න වෙලා  තිබ්බේ. අවසාන වසරේ ව්‍යාපෘතිය, පර්යේෂණය කියන ඒවා දෙකේම  අවසන් වාර්ථා, ඉදිරිපත් කිරීම් වලින් හෙම්බත් වෙලා තිබ්බා විතරක් නෙවේ. ඊට පස්සේ අනාගතේ ගැන හිතලා රස්සාවක් හොයාගන්නත් මහන්සි වෙන්න උණා. ඔය අතරේ සරසවියට එනවට වැඩිය කට්ටක් කාලා එකෙන් අයින් වෙන්න මහන්සි උණා. මොකද ඒ තරමට අත්සන් ගොඩක් ගහගන්න වෙලා තිබ්බා. කොහොමින් කොහොම හරි මේ මාසේ 13 වෙනි බ්‍රහස්පතින්දා තමයි යකා අවසාන වතාවට සරසවියට ශිෂ්‍යයෙක් හැටියට කැම්පස් ගියේ. 

එදා අවසන් කෙරුවේ අවුරුදු 4 හමාරකට කිට්ටු වෙන්න ආපු වෙනම යුගය කියලා මතක් වෙද්දී හිතට මොකක්දෝ වගේ. පළවෙනි වතාවට රුහුණු සරසවියේ ඉංජිනේරු පීඨය‍ට තේරිලාත් මොරටු සරසවියටම එන්න ඕනේ හින්දා විභාගේ තව පාරක් කෙරුවේ ඒ තරමටම මේක ගැන උණක් තිබ්බ හින්දා. පස්සේ කාලේක නම් ඒ තීරණය ගැන පසුතැවිලි උණත්, අයින් වෙලා යන වෙලාවේ නම් හිතුණේ එදා මොරටුම එන්න ගත්ත තීරණය වරදක් නෑ කියලා. 

මේ පරණ දේවල් කියන්න කියලා හිතාගෙන නෙවේ මේක ලියන්න ගත්තේ. අලුත් විස්තර කියන්න. දැන් අලුත්ම තැනක ඉදන් අලුත් ජිවිතයක් පටන් ගන්න යන්නේ. ඒ හැටන් - නුවර එළිය මාර්ගය අලුතෙන් සකස් කරන ව්‍යාපෘතියේ සැලසුම් ඉංජිනේරුවෙක් විදියට. කොහොමත් දුර බැහැර පළාතක පළවෙනි රස්සාව කරන්න ආසාවකුත් හිතේ තිබ්බා. පුහුණු කාල සිමාවේ මහියංගණයට ගියෙත් මේ පිස්සුව හින්දාමයි. මෙතනත් කියන්න තරම් වරදක් නෑ. මහියංගනයේ චීන ජාතිකයන් එක්ක වැඩ කෙරුවා වගේ මෙහේ වැඩ කරන්න වෙලා තියෙන්නේ කොරියන් ජාතිකයන් එක්ක. මේක පළවෙනි රස්සාව විදියට සතුටු වෙන්න පුළුවන් එකක් කියලා හිතෙනවා. වටපිටාව උණත් පුදුම ලස්සනයි. ඉහල කොත්මලේ ජලාශය හින්ද ශාන්ත ක්ලෙයාර් දිය ඇල්ලේ ලස්සන මැකිලා ගිහින් තියන එක හැරුණාම, පරිසරය ගැන පොඩි අඩුවක් වත් කියන්න බෑ. උදේට නැවතිලා ඉන්න තැනට පොඩ්ඩක් එහාට ගියපුවාම ශ්‍රී පාදයට උඩින් ඉර පායනවා හරි අපූරුවට පේනවා. (අපරාදේ කියන්න බෑ, මම මේක තාම දැක්කේ නෑ. කාටද පුලුවන් මේ සිතලේ නැගිටින්න. මම හොදට පොරවාගෙන නිදා ගන්නවා. මෙතන ඉන්න අයියා කෙනෙක් තමයි කිව්වේ). ඉතිං ඔහොමයි දැනට තත්ත්වය. ඉස්සරහට තව දේවල් කතා කරමු.

සමාවෙන්න ඕනේ හැමෝම, මේ දවස් ටිකේ කාගේවත් බ්ලොග් වලට යන්නත් බැරි උණා. අද ඉදන් වත් ආපහු පුරුදු විදියට පටන් ගන්න ඕනේ. ඒත් හැන්දෑවට බෝඩිමට ගියාට පස්සේ කාලා නිදා ගන්නවා ඇරුනාම වෙන දෙයක් කරන්න හිතෙන්නේ නෑ. කැම්පස් එකේදී පුරුදු වෙලා තිබ්බ නිශාචර ජීවිතය මෙහාට හරියන්නේ නෑ. අලුත් දෙයක් පුරුදු වෙන්න ඕන. ආපහු ඉක්මනින් හම්බෙමු කට්ටියම එහෙනම්.